गर्भो प्रकृति/गर्भोपक्रमविज्ञानं – Garva prakriti

1. प्रथमेऽहनि रेतश्च संयोगात्कललं च यत्
   जायते बुद्बुदाकारं शोणितञ्च दशाहनि १७
2. घनं पञ्चदशाहे स्याद्विंशाहे मांसपिण्डकम्
   पञ्चविंशत्तमे प्राप्ते पञ्चभूतात्मसम्भवः १८
3. मासैकेन च पिण्डस्य पञ्चतत्त्वं प्रजायते
   पञ्चाशद्दिनसम्प्राप्ते अङ्कुराणाञ्च सम्भवः १९
4. मासत्रये तु सम्प्राप्ते हस्तपादौ प्रवर्धते
   सार्द्धमासत्रये प्राप्ते शिरश्च सारवद्भवेत् २०
5. चतुर्थके च लोमानां सम्भवश्चात्र दृश्यते
   पञ्चमे च सुजीवः स्यात्षष्ठे प्रस्फुरणं भवेत् २१
6. अष्टमे मासि जाते च अग्नियोगः प्रवर्त्तते
   मासे तु नवमे प्राप्ते जायते तस्य चेष्टितम् २२
7. जायते तस्य वैराग्यं गर्भवासस्य कारणात्
   दशमे च प्रसूयेत तथैकादशमेऽपिवा २३

हारीतसंहिता षष्ठस्थानम्