अथातो धर्मं व्याख्यास्यामः । १,१.१ ।
यतोऽभ्युदयनिःश्रेयससिद्धिः स धर्मः । १,१.२ ।
तद्वचनादाम्नायस्य प्रामाण्यम् । १,१.३ ।
धर्मविशेष प्रसूतात्द्रव्यगुणकर्मसामान्य विशेषसमवायानां पदार्थानां साधर्म्यवैधर्म्याभ्यां तत्त्वज्ञानान्निःश्रेयसम् । १,१.४ ।
पृथिव्यापस्तेजो वायुराकाशं कालो दिगात्मा मन इति द्रव्याणि । १,१.५ ।
रुपरसगन्धस्पर्शाः संख्याः परिमाणानि पृथक्त्वं संयोगविभागौ परत्वापरत्वे बुद्धयः सुखदुःखे इच्छाद्वेषौ प्रयत्नाश्च गुणाः । १,१.६ ।
उत्क्षेपणमवक्षेपणमाकुञ्चनं प्रसारणं गमनमिति कर्माणि । १,१.७ ।
सदनित्यं द्रव्यवत्कार्यं कारणं सामान्यविशेषवदिति द्रव्यगुणकर्मणामविशेषः । १,१.८ ।
द्रव्यगुणयोः सजातीयारम्भकत्वं साधर्म्यम् । १,१.९ ।
द्रव्याणि द्रव्यान्तरमारभन्ते गुणाश्च गुणान्तरम् । १,१.१० ।
कर्म कर्मसाध्यं न विद्यते । १,१.११ ।
न द्रव्यं कारणं च भवति । १,१.१२ ।
उभयथा गुणाः । १,१.१३ ।
कार्यविरोधि कर्म । १,१.१४ ।
क्रियागुणवत्समवायिकारणमिति द्रव्यलक्षणम् । १,१.१५ ।
द्रव्याश्रय्यगुणवान् संयोगविभागेष्वकारणमनपेक्ष इति गुणलक्षणम् । १,१.१६ ।
एकद्रव्यमगुणं संयोगविभागेष्वनपेक्ष कारणमिति कर्मलक्षणम् । १,१.१७ ।
द्रव्यगुणकर्मणां द्रव्यं कारणं सामान्यम् । १,१.१८ ।
तथा गुणः । १,१.१९ ।
संयोगविभागवेगानां कर्म समानम् । १,१.२० ।
न द्रव्याणां कर्म । १,१.२१ ।
व्यतिरेकात् । १,१.२२ ।
द्रव्याणां द्रव्यं कार्यं सामान्यम् । १,१.२३ ।
गुणवैधर्म्यान्न कर्मणां कर्म । १,१.२४ ।
द्वित्वप्रभृतयः संख्याः पृथक्त्व संयोग विभागाश्च । १,१.२५ ।
असमवायात्सामान्यकार्यं कर्म न विद्यते । १,१.२६ ।
संयोगानां द्रव्यम् । १,१.२७ ।
रूपाणां रूपम् । १,१.२८ ।
गुरुत्वप्रयत्नसंयोगानामुत्क्षेपणम् । १,१.२९ ।
संयोगविभागाश्च कर्मणाम् । १,१.३० ।
कारणसामान्ये द्रव्यकर्मणां कर्माकारणमुक्तम् । १,१.३१ ।
कारणाभावात्कार्याभावः । १,२.१ ।
न तु कार्याभावात्कारणाभावः । १,२.२ ।
सामान्यविशेष इति बुद्ध्यपेक्षम् । १,२.३ ।
भावोऽनुवृत्तेरेव हेतुत्वात्सामान्यमेव । १,२.४ ।
द्रव्यत्वं गुणत्वं कर्मत्वं च सामान्यानि विशेषाश्च । १,२.५ ।
अन्यत्रान्त्येभ्यो विशेषेभ्यः । १,२.६ ।
सदिति यतो द्रव्यगुणकर्मसु सा सत्ता । १,२.७ ।
द्रव्यगुणकर्मभ्योर्ऽथान्तरं सत्ता । १,२.८ ।
गुणकर्मसु च भावान्न कर्म न गुणः । १,२.९ ।
सामान्यविशेषाभावेन च । १,२.१० ।
अनेकद्रव्यवत्त्वेन द्रव्यत्वमुक्तम् । १,२.११ ।
सामान्यविशेषाभावेन च । १,२.१२ ।
तथा गुणेषु भावाद्गुणत्वमुक्तम् । १,२.१३ ।
सामान्यविशेषाभावेन च । १,२.१४ ।
कर्मसु भावात्कर्मत्वमुक्तम् । १,२.१५ ।
सामान्यविशेषाभावेन च । १,२.१६ ।
सदिति लिङ्गाविशेषात्विशेषलिङ्गाभावाच्चैको भावः । १,२.१७ ।
रूपरसगन्धस्पर्शवती पृथिवी । २,१.१ ।
रूपरसस्पर्शवत्य आपो द्रवाः स्निग्धाः । २,१.२ ।
तेजो रूपस्पर्शवत् । २,१.३ ।
स्पर्शवान् वायुः । २,१.४ ।
त आकाशे न विद्यन्ते । २,१.५ ।
सर्पिर्जतुमधूच्छिष्टानामग्निसंयोगाद्द्रवत्वमद्भिः सामान्यम् । २,१.६ ।
त्रपुसीस लोह रजत सुवर्णानामग्निसंयोगाद्द्रवत्वमद्भिः सामान्यम् । २,१.७ ।
विषाणी ककुद्मान् प्रान्तेवालधिः सास्नावानिति गोत्वे दृष्टं लिङ्गम् । २,१.८ ।
स्पर्शश्च वायोः । २,१.९ ।
न च दृष्टानां स्पर्श इत्यदृष्टलिङ्गो वायुः । २,१.१० ।
अद्रव्यवत्त्वेन द्रव्यम् । २,१.११ ।
क्रियावत्त्वात्गुणवत्त्वाच्च । २,१.१२ ।
अद्रव्यत्वेन नित्यत्वमुक्तम् । २,१.१३ ।
वायोर्वायुसंमूर्छनं नानात्वलिङ्गम् । २,१.१४ ।
वायुसन्निकर्षे प्रत्यक्षाभावात्दृष्टं लिङ्गं न विद्यते । २,१.१५ ।
सामान्यतो दृष्टाच्चाविशेषः । २,१.१६ ।
तस्मादागमिकम् । २,१.१७ ।
संज्ञाकर्म त्वस्मद्विशिष्टानां लिङ्गम् । २,१.१८ ।
प्रत्यक्षप्रवृत्तत्वात्संज्ञाकर्मणः । २,१.१९ ।
निष्क्रमणं प्रवेशनमित्याकाशस्य लिङ्गम् । २,१.२० ।
तदलिङ्गमेकद्रव्यत्वात्कर्मणः । २,१.२१ ।
कारणान्तरानुकिप्ति वैधर्म्याच्च । २,१.२२ ।
संयोगादभावः कर्मणः । २,१.२३ ।
कारणगुणपूर्वकः कार्यगुणो दृष्टः । २,१.२४ ।
कार्यान्तराप्रादुर्भावाच्च शब्दः स्पर्शवतामगुणः । २,१.२५ ।
परत्र समवायात्प्रत्यक्षत्वाच्च नात्मगुणो न मनोगुणः । २,१.२६ ।
परिशेषाल्लिङ्गमाकाशस्य । २,१.२७ ।
द्रव्यत्वनित्यत्वे वायुना व्याख्याते । २,१.२८ ।
तत्त्वम्भावेन । २,१.२९ ।
शब्दालिङ्गाविशेषाद्विशेषलिङ्गाभावाच्च । २,१.३० ।
तदनुविधानादेकपृथक्त्वञ्चेति । २,१.३१ ।
पुष्पवस्त्रयोः सति सन्निकर्षे गुणान्तराप्रादुर्भावो वस्त्रे गन्धाभावलिङ्गम् । २,२.१ ।
व्यवस्थितः पृथिव्यां गन्धः । २,२.२ ।
एतेनोष्णता व्याख्याता । २,२.३ ।
तेजस उष्णता । २,२.४ ।
अप्सु शीतता । २,२.५ ।
अपरस्मिन्नपरं युगपत्चिरं क्षिप्रमिति काललिङ्गानि । २,२.६ ।
द्रव्यत्व नित्यत्वे वायुना व्याख्याते । २,२.७ ।
तत्त्वम्भावेन । २,२.८ ।
नित्योष्वभावादनित्येषु भावात्कारणे कालाख्येति । २,२.९ ।
इत इदमिति यतस्तद्दिश्यं लिङ्गम् । २,२.१० ।
द्रव्यत्व नित्यत्वे वायुना व्याख्याते । २,२.११ ।
तत्त्वम्भावेन । २,२.१२ ।
कार्यविशेषेण नानात्वम् । २,२.१३ ।
आदित्यसंयोगात्भूतपूर्वात्भविष्यतो भूताच्च प्राची । २,२.१४ ।
तथा दक्षिणा प्रतीची उदीची च । २,२.१५ ।
एतेन दिगन्तरालानि व्याख्यातानि । २,२.१६ ।
सामान्यप्रत्यक्षाद्विशेषस्मृतेश्च संशयः । २,२.१७ ।
दृष्टञ्च दृष्टवत् । २,२.१८ ।
यथादृष्टमयथादृष्टत्वाच्च । २,२.१९ ।
विद्याविद्यातश्च संशयः । २,२.२० ।
श्रोत्रग्रहणो योर्ऽथः स शब्दः । २,२.२१ ।
तुल्यजातीयेष्वर्थान्तरभूतेषु विशेषस्य उभयथा दृष्टत्वात् । २,२.२२ ।
एकद्रव्यत्वान्न द्रव्यम् । २,२.२३ ।
नापि कर्माचाक्षुषत्वात् । २,२.२४ ।
गुणस्य सतोऽपवर्गः कर्मभिः साधर्म्यम् । २,२.२५ ।
सतो लिङ्गाभावात् । २,२.२६ ।
नित्यवैधर्म्यात् । २,२.२७ ।
अनित्यश्चायं कारणतः । २,२.२८ ।
ज चासिद्धं विकारात् । २,२.२९ ।
अभिव्यक्तौ दोषात् । २,२.३० ।
संयोगाद्विभागाच्च शब्दाच्च शब्दनिष्पत्तिः । २,२.३१ ।
लिङ्गाच्चानित्यः शब्दः । २,२.३२ ।
द्वयोस्तु प्रवृत्त्योरभावात् । २,२.३३ ।
प्रथमाशब्दात् । २,२.३४ ।
सम्प्रतिपत्तिभावाच्च । २,२.३५ ।
सन्दिग्धाः सति बहुत्वे । २,२.३६ ।
संख्याभावः सामान्यतः । २,२.३७ ।
प्रसिद्धा इन्द्रियार्थाः । ३,१.१ ।
इन्द्रियार्थाप्रसिद्धिरिन्द्रियार्थेभ्योर्ऽथान्तरस्य हेतुः । ३,१.२ ।
सोऽनपदेशः । ३,१.३ ।
कारणाज्ञानात् । ३,१.४ ।
कार्येषु ज्ञानात् । ३,१.५ ।
अज्ञानाच्च । ३,१.६ ।
अन्यदेव हेतुरित्यनपदेशः । ३,१.७ ।
अर्थान्तरं ह्यर्थान्तरस्यानपदेशः । ३,१.८ ।
संयोगि समवाय्येकार्थसमवायि विरोधि च । ३,१.९ ।
कार्यं कार्यान्तरस्य । ३,१.१० ।
विरोध्यभूतं भूतस्य । ३,१.११ ।
भूतमभूतस्य । ३,१.१२ ।
भूतो भूतस्य । ३,१.१३ ।
प्रसिद्धिपूर्वकत्वादपदेशस्य । ३,१.१४ ।
अप्रसिद्धोऽनपदेशोऽसन् सन्दिग्धश्चानपदेशः । ३,१.१५ ।
यस्माद्विषाणी तस्मादश्वः । ३,१.१६ ।
यस्माद्विषाणी तस्माद्गौरितिचानैकान्तिकस्योदाहरणम् । ३,१.१७ ।
आत्मेन्द्रियार्थसन्निकर्षाद्यन्निष्पद्यते तदन्यत् । ३,१.१८ ।
प्रवृत्तिनिवृत्ती च प्रत्यगात्मनि दृष्टे परत्र लिङ्गम् । ३,१.१९ ।
आत्मेन्द्रियार्थसन्निकर्षज्ञानस्य भावोऽभावश्च मनसो लिङ्गम् । ३,२.१ ।
तस्य द्रव्यत्व नित्यत्वे वायुना व्याख्याते । ३,२.२ ।
प्रयत्नायौगपद्याज्ज्ञानायौगपद्याच्चैकम् । ३,२.३ ।
प्राणापाननिमेषोन्मेषजीवनमनोगतीन्द्रियान्तर विकाराः सुखदुःखेच्छाद्वेष प्रयत्नाश्चात्मनो लिङ्गानि । ३,२.४ ।
तस्य द्रव्यत्वनित्यत्वे वायुना व्याख्याते । ३,२.५ ।
यज्ञदत्त इति सन्निकर्षे प्रत्यक्षाभावात्दृष्टं लिङ्गं न विद्यते । ३,२.६ ।
सामान्यतो दृष्टाच्चाविशेषः । ३,२.७ ।
तस्मादागमिकः । ३,२.८ ।
अहमिति शब्दस्य व्यतिरेकान्नागमिकम् । ३,२.९ ।
यदि दृष्टमन्वक्षमहं देवदत्तोऽहं यज्ञदत्त इति । ३,२.१० ।
दृष्ट्यात्मनि लिङ्गे एक एव दृढत्वात्प्रत्यक्षवत्प्रत्ययः । ३,२.११ ।
देवदत्तो गच्छति यज्ञदत्तो गच्छतीत्युपचाराच्छरीरे प्रत्ययः । ३,२.१२ ।
सन्दिग्धास्तूपचाराः । ३,२.१३ ।
अहमिति प्रत्यगात्मनि भावात्परत्राभावादर्थान्तर प्रत्यक्षः । ३,२.१४ ।
देवदत्तो गच्छतीत्युपचारादभिमानात्तावच्छरीरप्रत्यक्षोऽहङ्कारः । ३,२.१५ ।
सन्दिग्धस्तूपचारः । ३,२.१६ ।
न तु शरीरविशेषाद्यज्ञदत्त विष्णुमित्रयोर्ज्ञानविषयः । ३,२.१७ ।
अहमिति मुख्ययोग्याभ्यां शब्दवद्व्यतिरेकाव्यभिचाराद्विशेष सिद्धेर्नागमिकः । ३,२.१८ ।
सुखदुःख ज्ञाननिष्पत्त्यविशेषादैकात्म्यम् । ३,२.१९ ।
व्यवस्थातो नाना । ३,२.२० ।
शास्त्रसामर्थ्याच्च । ३,२.२१ ।
सदकारणवन्नित्यम् । ४,१.१ ।
तस्य कार्यं लिङ्गम् । ४,१.२ ।
कारणभावात्कार्याभावः । ४,१.३ ।
अनित्य इति विशेषतः प्रतिषेधभावः । ४,१.४ ।
अविद्या । ४,१.५ ।
महत्यनेकद्रव्यवत्त्वात्रूपाच्चोपलब्धिः । ४,१.६ ।
सत्यपि द्रव्यत्वे महत्त्वे रूपसंस्काराभावाद्वायोरनुपलब्धिः । ४,१.७ ।
अनेकद्रव्यसमवायात्रूपविशेषाच्च रूपोपलब्धिः । ४,१.८ ।
तेन रसगन्धस्पर्शेषु ज्ञानं व्याख्यातम् । ४,१.९ ।
तस्याभावादव्यभिचारः । ४,१.१० ।
संख्याः परिमाणानि पृथक्त्वं संयोग विभागौ परत्वापरत्वे कर्म च रूपद्रव्यसमवायात्चाक्षुषाणि । ४,१.११ ।
अरूपिष्वचाक्षुषाणि । ४,१.१२ ।
एतेन गुणत्वे भावे च सर्वेन्द्रियं ज्ञानं व्याख्यातम् । ४,१.१३ ।
तत्पुनः पृथिव्यादिकार्यद्रव्यं त्रिविधं शरीरेन्द्रियविषयसंज्ञकम् । ४,२.१ ।
प्रत्यक्षाप्रत्यक्षाणां संयोगस्याप्रत्यक्षत्वात्पञ्चात्मकं न विद्यते । ४,२.२ ।
गुणान्तराप्रादुर्भावाच्च न त्र्यात्मकम् । ४,२.३ ।
अणुसंयोगस्त्वप्रतिषिद्धः । ४,२.४ ।
तत्र शरीरं द्विविधं योनिजमयोनिजं च । ४,२.५ ।
अनियतदिग्देशपूर्वकत्वात् । ४,२.६ ।
धर्मविशेषाच्च । ४,२.७ ।
समाख्याभावाच्च । ४,२.८ ।
संज्ञाया आदित्वात् । ४,२.९ ।
सन्त्ययोनिजाः । ४,२.१० ।
वेदलिङ्गाच्च । ४,२.११ ।
आत्मसंयोग प्रयत्नाभ्यां हस्ते कर्म । ५,१.१ ।
तथा हस्तसंयोगाच्च मुसले कर्म । ५,१.२ ।
अभिघातजे मुसलादौ कर्मणि व्यतिरेकादकारणं हस्तसंयोगः । ५,१.३ ।
तथात्मसंयोगो हस्तकर्मणि । ५,१.४ ।
अभिघातान्मुसलसंयोगाद्धस्ते कर्म । ५,१.५ ।
आत्मकर्म हस्तसंयोगाच्च । ५,१.६ ।
संयोगाभावे गुरुत्वात्पतनम् । ५,१.७ ।
नोदनविशेषाभावान्नोर्ध्वं न तिर्यग्गमनम् । ५,१.८ ।
प्रयत्नविशेषान्नोदन विशेषः । ५,१.९ ।
नोदनविशेषादुदसनविशेषः । ५,१.१० ।
हस्तकर्मणा दारककर्म व्याख्यातम् । ५,१.११ ।
तथा दग्धस्य विस्फोटने । ५,१.१२ ।
यत्नाभावे प्रसुप्तस्य चलनम् । ५,१.१३ ।
तृणे कर्म वायुसंयोगात् । ५,१.१४ ।
मणिगमनं सूच्यभिसर्पणमदृष्टकारणम् । ५,१.१५ ।
इषावयुगपत्संयोगविशेषाः कर्मान्यत्वे हेतुः । ५,१.१६ ।
नोदनादाद्यमिषोः कर्म तत्कर्मकारिताच्च संस्कारादुत्तरं तथोत्तरमुत्तरं च । ५,१.१७ ।
संस्काराभावे गुरुत्वात्पतनम् । ५,१.१८ ।
नोदनाभिघातात्संयुक्तसंयोगाच्च पृथिव्यां कर्म । ५,२.१ ।
तद्विशेषेणादृष्टकारितम् । ५,२.२ ।
अपां संयोगाभावे गुरुत्वात्पतनम् । ५,२.३ ।
द्रवत्वात्स्यन्दनम् । ५,२.४ ।
नाड्या वायुसंयोगादारोहणम् । ५,२.५ ।
नोदनापीडनात्संयुक्तसंयोगाच्च । ५,२.६ ।
वृक्षाभिसर्पणमित्यदृष्टकारितम् । ५,२.७ ।
अपां सङ्घातो विलयनं च तेजः संयोगात् । ५,२.८ ।
तत्र विस्फूर्जतुर्लिङ्गम् । ५,२.९ ।
वैदिकं च । ५,२.१० ।
अपां संयोगाद्विभागाच्च स्तनयित्नोः । ५,२.११ ।
पृथिवीकर्मणा तेजः कर्म वायुकर्म च व्याख्यातम् । ५,२.१२ ।
अग्नेरूर्ध्वज्वलनं वायोस्तिर्यग्गमनमणूनां मनसश्चाद्यं कर्मादृष्टकारितम् । ५,२.१३ ।
हस्तकर्मणा मनसः कर्म व्याख्यातम् । ५,२.१४ ।
आत्मेन्द्रियमनोर्ऽथसन्निकर्षात्सुख दुःखे । ५,२.१५ ।
तदनारम्भ आत्मस्थे मनसि शरीरस्य दुःखाभावः संयोगः । ५,२.१६ ।
अपसर्पणमुपसर्पणमशित पीतसंयोगाः कार्यान्तर संयोगाश्चेत्यदृष्टकारितानि । ५,२.१७ ।
तदभावे संयोगाभावोऽप्रादुर्भावश्च मोक्षः । ५,२.१८ ।
द्रव्यगुणकर्मनिष्पत्तिवैधर्म्यादभावस्तमः । ५,२.१९ ।
तेजसो द्रव्यान्तरेणावरणाच्च । ५,२.२० ।
दिक्कालावाकाशं च क्रियावद्वैधर्म्यान्निष्क्रियाणि । ५,२.२१ ।
एतेन कर्माणि गुणाश्च व्याख्याताः । ५,२.२२ ।
निष्क्रियाणां समवायः कर्मभ्यो निषिद्धः । ५,२.२३ ।
कारणं त्वसमवायिनो गुणाः । ५,२.२४ ।
गुणैर्दिक्व्याख्याता । ५,२.२५ ।
कारणेन कालः । ५,२.२६ ।
बुद्धिपूर्वा वाक्यकृतिर्वेदे । ६,१.१ ।
ब्राह्मणे संज्ञाकर्म सिद्धिलिङ्गम् । ६,१.२ ।
बुद्धिपूर्वो ददातिः । ६,१.३ ।
तथा प्रतिग्रहः । ६,१.४ ।
आत्मान्तरगुणानामात्मान्तरेऽकारणत्वात् । ६,१.५ ।
तद्दुष्टभोजने न विद्यते । ६,१.६ ।
दुष्टं हिंसायाम् । ६,१.७ ।
तस्य समभिव्याहारतो दोषः । ६,१.८ ।
तददुष्टे न विद्यते । ६,१.९ ।
पुनर्विशिष्टे प्रवृत्तिः । ६,१.१० ।
समे हीने वा प्रवृत्तिः । ६,१.११ ।
एतेन हीनसमविशिष्ट धार्मिकेभ्यः परस्वादानं व्याख्यातम् । ६,१.१२ ।
तथा विरुद्धानां त्यागः । ६,१.१३ ।
हीने परे त्यागः । ६,१.१४ ।
समे आत्मत्यागः परत्यागो वा । ६,१.१५ ।
विशिष्टे आत्मत्याग इति । ६,१.१६ ।
दृष्टादृष्ट प्रयोजनानां दृष्टाभावे प्रयोजनमभ्युदयाय । ६,२.१ ।
अभिषेचनोपवास ब्रह्मचर्यगुरुकुलवासवानप्रस्थ यज्ञदान प्रोक्षणदिङ्नक्षत्रमन्त्रकालनियमाश्चादृष्टाय । ६,२.२ ।
चातुराश्रम्यमुपधा अनुपधाश्च । ६,२.३ ।
भावदोष उपधादोषोऽनुपधा । ६,२.४ ।
यदिष्टरूपरसगन्धस्पर्शं प्रोक्षितमभ्युक्षितं च तच्छुचि । ६,२.५ ।
अशुचीति शुचिप्रतिषेधः । ६,२.६ ।
अर्थान्तरं च । ६,२.७ ।
अयतस्य शुचिभोजनादभ्युदयो न विद्यते नियमाभावाद्विद्यते वार्ऽथान्तरत्वाद्यमस्य । ६,२.८ ।
असति चाभावात् । ६,२.९ ।
सुखाद्रागः । ६,२.१० ।
तन्मयत्वाच्च । ६,२.११ ।
अदृष्टाच्च । ६,२.१२ ।
जातिविशेषाच्च । ६,२.१३ ।
इच्छाद्वेषपूर्विका धर्माधर्म प्रवृत्तिः । ६,२.१४ ।
तत्संयोगो विभागः । ६,२.१५ ।
आत्मकर्मसु मोक्षो व्याख्यातः । ६,२.१६ ।
उक्ता गुणाः । ७,१.१ ।
पृथिव्यादि रूपरसगन्धस्पर्शा द्रव्यानित्यत्वादनित्याश्च । ७,१.२ ।
एतेन नित्येषु नित्यत्वमुक्तम् । ७,१.३ ।
अप्सु तेजसि वायौ च नित्या द्रव्यनित्यवात् । ७,१.४ ।
अनित्येष्वनित्या द्रव्यानित्यत्वात् । ७,१.५ ।
कारणगुणपूर्वकाः पृथिव्यां पाकजाः । ७,१.६ ।
एकद्रव्यत्वात् । ७,१.७ ।
अणोर्महतश्चोपलब्ध्यनुपलब्धी नित्ये व्याख्याते । ७,१.८ ।
कारण बहुत्वाच्च । ७,१.९ ।
अतो विपरितमणु । ७,१.१० ।
अणु महदिति तस्मिन् विशेषभावात्विशेषाभावाच्च । ७,१.११ ।
एककालत्वात् । ७,१.१२ ।
दृष्टान्ताच्च । ७,१.१३ ।
अणुत्वमहत्त्वयोरणुत्वमहत्त्वाभावः कर्मगुणैर्व्याख्यातः । ७,१.१४ ।
कर्मभिः कर्माणि गुणैश्च गुणा व्याख्याताः । ७,१.१५ ।
अणुत्वमहत्त्वाभ्यां कर्मगुणाश्च व्याख्याताः । ७,१.१६ ।
एतेन दीर्घत्व ह्रस्वत्वे व्याख्याते । ७,१.१७ ।
अनित्येऽनित्यम् । ७,१.१८ ।
नित्ये नित्यम् । ७,१.१९ ।
नित्यं परिमण्डलम् । ७,१.२० ।
अविद्या च विद्यालिङ्गम् । ७,१.२१ ।
विभवान्महानाकाशः तथा चात्मा । ७,१.२२ ।
तदभावादणु मनः । ७,१.२३ ।
गुणैर्दिग्व्याख्याता । ७,१.२४ ।
कारणेन कालः । ७,१.२५ ।
रुपरसगन्धस्पर्शव्यतिरेकादर्थान्तरमेकत्वम् । ७,२.१ ।
तथा पृथक्त्वम् । ७,२.२ ।
एकत्वैकपृथक्त्वयोरेकत्वैकपृथक्त्वाभावोऽणुत्वमहत्त्वाभ्यां व्याख्यातः । ७,२.३ ।
निः संख्यत्वात्कर्मगुणानां सर्वैकत्वं न विद्यते । ७,२.४ ।
भ्रान्तं तत् । ७,२.५ ।
एकत्वाभावाद्भक्तिस्तु न विद्यते । ७,२.६ ।
कार्यकारणयोरेकत्वैकपृथक्त्वाभावादेकत्वैकपृथक्त्वं न विद्यते । ७,२.७ ।
एतदनित्ययोर्व्याख्यातम् । ७,२.८ ।
अन्यतरकर्मज उभकर्मजः संयोगजश्च संयोगः । ७,२.९ ।
एतेन विभागो व्याख्यातः । ७,२.१० ।
संयोगविभागयोः संयोगविभागाभावः अणुत्वमहत्त्वाभ्यां व्याख्यातः । ७,२.११ ।
कर्मभिः कर्माणि गुणैर्गुणा अणुत्व महत्त्वाभ्यामिति । ७,२.१२ ।
युतसिद्ध्यभावात्कार्यकारणयोः संयोगविभागौ न विद्येते । ७,२.१३ ।
गुणत्वात् । ७,२.१४ ।
गुणोऽपि विभाव्यते । ७,२.१५ ।
निष्क्रियत्वात् । ७,२.१६ ।
असति नास्तीति च प्रयोगात् । ७,२.१७ ।
शब्दार्थावसम्बन्धौ । ७,२.१८ ।
संयोगिनो दण्डात्समवायिनो विशेषाच्च । ७,२.१९ ।
सामयिकः शब्दादर्थप्रत्ययः । ७,२.२० ।
एकदिक्काभ्यामेककालाभ्यां सन्निकृष्टविप्रकृष्टाभ्यां परमपरञ्च । ७,२.२१ ।
कारणपरत्वात्कारणापरत्वाच्च । ७,२.२२ ।
परत्वापरत्वयोः परत्वापरत्वाभावोऽणुत्वमहत्त्वाभ्यां व्याख्यातः । ७,२.२३ ।
कर्मभिः कर्माणि । ७,२.२४ ।
गुणैर्गुणाः । ७,२.२५ ।
इहेदमिति यतः कार्यकारणयोः स समवायः । ७,२.२६ ।
तत्त्वम्भावेन । ७,२.२७ ।
द्रव्येषु ज्ञानं व्याख्यातम् । ८,१.१ ।
तत्रात्मा मनश्चाप्रत्यक्षे । ८,१.२ ।
ज्ञाननिर्देशे ज्ञाननिष्पत्तिविधिरुक्तः । ८,१.३ ।
गुणकर्मसु सन्निकृष्टेषु ज्ञाननिष्पत्तेः द्रव्यं कारणम् । ८,१.४ ।
सामान्यविशेषेषु सामान्यविशेषाभावात्तदेव ज्ञानम् । ८,१.५ ।
सामान्यविशेषापेक्षं द्रव्यगुणकर्मसु । ८,१.६ ।
द्रव्ये द्रव्यगुणकर्मापेक्षम् । ८,१.७ ।
गुणकर्मसु गुणकर्माभावात्गुणकर्मापेक्षं न विद्यते । ८,१.८ ।
समवायिनः श्वैत्याच्छ्वैत्य बुद्धेश्च श्वेते बुद्विस्ते एते कार्यकारणभूते । ८,१.९ ।
द्रव्येष्वनितरेतरकारणाः । ८,१.१० ।
कारणायौगपद्यात्कारणक्रमाच्च घटपटादिबुद्धीनां क्रमो न हेतुफलभावात् । ८,१.११ ।
अयमेष त्वया कृतं भोजयैनमिति बुद्ध्यपेक्षम् । ८,२.१ ।
दृष्टेषु भावाददृष्टेष्वभावात् । ८,२.२ ।
अर्थ इति द्रव्यगुणकर्मसु । ८,२.३ ।
द्रव्येषु पञ्चात्मकत्वं प्रतिषिद्धम् । ८,२.४ ।
भूयस्त्वात्गन्धवत्त्वाच्च पृथिवी गन्धज्ञाने प्रकृतिः । ८,२.५ ।
तथापस्तेजो वायुश्च रसरूपस्पर्शाविशेषात् । ८,२.६ ।
क्रियागुणव्यपदेशाभावात्प्रागसत् । ९,१.१ ।
सदसत् । ९,१.२ ।
असतः क्रियागुणव्यपदेशाभावादर्थान्तरम् । ९,१.३ ।
सच्चासत् । ९,१.४ ।
यच्चान्यदसदतस्तदसत् । ९,१.५ ।
असदिति भूतप्रत्यक्षाभावात्भूतस्मृतेर्विरोधिप्रत्यक्षवत् । ९,१.६ ।
तथाभावे भावप्रत्यक्षाच्च । ९,१.७ ।
एतेनाघटोऽगौरधर्मश्च व्याख्याताः । ९,१.८ ।
अभूतं नास्तीत्यनर्थान्तरम् । ९,१.९ ।
नास्ति घटो गेहे इति सतो घटस्य गेहसंसर्गप्रतिषेधः । ९,१.१० ।
आत्मन्यात्ममनसोः संयोगादात्मप्रत्यक्षम् । ९,१.११ ।
तथा द्रव्यान्तरेषु प्रत्यक्षम् । ९,१.१२ ।
असमाहितान्तः करणा उपसंहृतसमाधयस्तेषाञ्च । ९,१.१३ ।
तत्समवायात्कर्मगुणेषु । ९,१.१४ ।
आत्मसमवायादात्मगुणेषु । ९,१.१५ ।
अस्येदं कार्यं कारणं संयोगि विरोधि समवायि चेति लैङ्गिकम् । ९,२.१ ।
अस्येदं कार्य कारणसम्बन्धश्चावयवाद्भवति । ९,२.२ ।
एतेन शाब्दं व्याख्यातम् । ९,२.३ ।
हेतुरपदेशो लिङ्गं प्रमाणं करणमित्यनर्थान्तरम् । ९,२.४ ।
अस्येदमिति बुद्ध्यपेक्षितत्वात् । ९,२.५ ।
आत्मनः संयोगविशेषात्संस्काराच्च स्मृतिः । ९,२.६ ।
तथा स्वप्नः । ९,२.७ ।
स्वप्नान्तिकम् । ९,२.८ ।
धर्माच्च । ९,२.९ ।
इन्द्रियदोषात्संस्कारदोषाच्चाविद्या । ९,२.१० ।
तद्दुष्टज्ञानम् । ९,२.११ ।
अदुष्टं विद्या । ९,२.१२ ।
आर्षं सिद्धदर्शनं च धर्मेभ्यः । ९,२.१३ ।
इष्टानिष्टकारणविशेषाद्विरोधाच्च मिथः सुखदुःखयोर्थान्तरभावः । १०,१.१ ।
संशयनिर्णयान्तराभावश्च ज्ञानान्तरत्वे हेतुः । १०,१.२ ।
तयोर्निष्पत्तिः प्रत्यक्षलैङ्गिकाभ्याम् । १०,१.३ ।
अभूदित्यपि । १०,१.४ ।
सति च कार्यादर्शनात् । १०,१.५ ।
एकार्थसमवायि कारणान्तरेषु दृष्टत्वात् । १०,१.६ ।
एकदेशे इत्येकस्मिन् शिरः पृष्ठमुदरं मर्माणि तद्विशेषस्तद्विशेषेभ्यः । १०,१.७ ।
कारणमिति द्रव्ये कार्यसमवायात् । १०,२.१ ।
संयोगाद्वा । १०,२.२ ।
कारणे समवायात्कर्माणि । १०,२.३ ।
तथा रूपे कारणैकार्थसमवायाच्च । १०,२.४ ।
कारणसमवायात्संयोगः पटस्य । १०,२.५ ।
कारणाकारणसमवायाच्च । १०,२.६ ।
संयुक्तसमवायादग्नेर्वैशेषिकम् । १०,२.७ ।
दृष्टानां दृष्टप्रयोजनानां दृष्टाभावे प्रयोगोऽभ्युदयाय । १०,२.८ ।
तद्वचनादाम्नायस्य प्रमाण्यमिति । १०,२.९ ।
